Neste mundo de autor, presento a fin de todo. Corre o ano 3100: o mundo é un páramo insalvable, os océanos secaron, os bosques morreron e isto só é o principio.

O xogo propón dirixir o último clan da humanidade: sobrevivir e xestionar a escaseza mentres o mundo se volve cada vez máis inhóspito, con temperaturas, eventos climáticos e toda clase de finais, como choivas de meteoritos e a destrución da Lúa, entre moitos máis. En Yo soy páramo agárdase a fin máis absoluta do planeta Terra e non hai salvación.

A dinámica principal consiste en sobrevivir tanto tempo como poidas, creando estratexias, buscando obxectivos propios, probando novas formas… con decisións permanentes e un pouco de azar.

Un mundo postapocalíptico que agocha, perdidas nas súas dinámicas de exploración, troco e outros segredos, poderosas tecnoloxías do glorioso pasado, antes do día 0, no que todo cambiou da noite para a mañá. Isto dá a posibilidade, durante a aventura, de aproveitalas para acadar maiores fitos.

Un xogo que require ensaio e erro, que recompensa o descubrimento e a planificación previa, con moitos detalleciños de autor e moito agarimo.